Beste behin, azaroaren 25aren aurrean gaude, indarkeria matxisten aurkako nazioarteko egunean. Gaur ez da soilik oroitzapen-eguna, borroka-eguna baizik, indarkeria matxisten aurkako erresistentzia guztiak agerian jartzen diren eguna. Gure bizitzak baldintzatzen dituzten indarkeriak egiturazkoak ere badirela gogorarazteko eguna da, urteetan salatu dugun bezala, indarkeria zuzenaz harago.
Indarkeria matxistak ezin dira hilketetara soilik murriztu, ezta bikote-harremanen barruko indarkerietara ere. Horrez gain, antolatutako emakumeak garela aldarrikatzeko eguna da, eta emakume guztien eskubideak defendatzen jarraituko dugula; askeak izateko eta patriarkatuaren uztarritik kanpo ibiltzeko eskubidea.
Azaroaren 25 honetan, berriro entzungo dugu erakunde publikoetatik eta lider politikoetatik indarkeria matxistaren gaitzespena, eta indarkeria mota hori desagerrarazteko konpromisoak hartzeko borondatea erakutsiko digute. Hala ere, gorakada hori eta erantzun sozial eta instituzionalen eza ikusita, argi dago matxismoaren hazkundea geldiarazteko tresna instituzionalak ez direla nahikoak.
Indarkeria matxistak patriarkatuaren parte dira, eta genero-kuestioa beste batzuekin gurutzatzen denean areagotzen dira. Hori dela eta, matxisten, LGBTI+fobikoen, arrazisten, xenofoboen eta klasisten jokabideek eragindako diskriminazio eta indarkeria instituzionaleko praktikak salatzen ditugu. Harriduraz ikusten dugu arau heteropatriarkal zuria betetzen ez duten kolektiboen aurkako indarkeria matxistak nola areagotzen diren, eta eskuin muturrak, bere forma guztietan, kolektibo horiek bere jomugan jarri dituela.
Aurten, ezin dugu alde batera utzi Palestinako sarraskia. Milaka pertsona hiltzen ari dira, eta emakumeak, beste behin, beren gorputza eta bizitza lehen lerroan jartzera behartuta daude, seme-alabak babestuz eta indarkeriaren eta zapalkuntzaren testuinguruan aurre eginez. Ezinbestekoa da gerra honek emakumeengan duen inpaktu neurrigabea ikusaraztea; izan ere, galerei eta oinazeari aurre egiteaz gain, bizitzari eta komunitateari eusteko ardura ere hartzen dute kaosaren erdian.
Palestinarrek beren erresistentzia erakusten ari dira. Askotan biktima pasiboen
irudian kokatu nahi izaten diren arren, azken hilabeteetan erakutsi duten indarrak irudi faltsu hori apurtzen du. Genozidioa hasi zenetik, laguntza humanitarioa eta babeslekuak antolatzen, ospitaleetan mediku gisa lan egiten eta kazetari gisa informazioa emateko beren bizitzak arriskatzen ikusi ditugu. Feminista internazionalistak garen aldetik, emakume palestinarren erresistentzia eta autodefentsa eskubidea defendatzen dugu. Betidanik izan dira Israelen
kolonialismoaren aurkako erresistentziaren parte.
Gizarte feminista, antikapitalista eta antiarrazista baten alde!
GORA BORROKA FEMINISTA!
